Ҳаётда шундай инсонлар бўладики, улар ҳақида ва уларнинг ҳаёт йўли тўғрисида фикр билдириш кишига завқ бағишлайди. Улар озгина иш қилиб қўйсаларда доимо инсонларнинг ардоғида бўлади. Улар ёшларга ҳар доим ўрнак ва намуна бўлиб келадилар. 

Жамиятнинг қай соҳаси ҳоҳ у таълим, ҳоҳ у спорт бўлсин ўз ишини жон дилдан севувчи, касбини ҳаётининг мазмунига айлантирган инсонлар хусусида қанча гапирсак, шунча оз. “Насаф” деганда бир инсонни унинг ёнига қўшмасдан гапириб бўлмайди. Ушбу инсон бу мақомга фақат ўзининг меҳнати билан сазовор бўлган. Топдингиз, гап Рўзиқул Бердиев ҳақида бормоқда. Бугун у кишининг таваллуд кунлари, Рўзиқул Бердиев бугун 41 ёшга тўлди. Табригимиз сўзимиз охирида бўлади, аввало у киши ҳақида бир-икки оғиз фикрларимиз бор.

Рўзиқул Бердиев 1971 йил 22 октябрда Қашқадарё вилояти Китоб туманида таваллуд топган. “Насаф” футбол клубига келгунга қадар Сирдарё вилоятининг “Янгиер” жамоасида 1993-96 йиллар мобайнида тўп тепган. 1997 йилдан бери “Насаф” билан бирга. 2008 йилда профессионал футболчилик фаолиятини якунлаб мураббийлар штабига қўшилган.

Рўзиқул Бердиев “Насаф” сафида 314 марта майдонга тушган. У жуда кўп мавсумда жамоага сардорлик ҳам қилди.

Қарийиб 15 йил! Фахримиз Рўзиқул Бердиев “Насаф”нинг профессионал клуб сифатида ташкил этилганидан бери жамоанинг муҳим бир бўлагига айланди. Шу вақт мобайнида мухлислар усиз жамоани тасаввур ҳам қилишмай қолди. Тўғрида, у ўйнаган пайтлари жамоани характерини намойиш қилиб, жамоага керакли ғалабаларни қўлга киритишда муҳим рол ўйнарди.

Унинг жамоапарварлиги, вазиятни тўғри ўқий олиш қобилияти футболчилик даврида аъло даражада бўлган, мураббийликка ўтгандан сўнг эса янаям ўсишда давом этмоқда. У оддий футболчиликдан бош мураббий даражасигача бўлган йўлни босиб ўтди. Машаққатлардан қочмади. Севимли касбини ҳаёти мазмунига айлантира олди. Ҳавас қиламиз, ахир бундай бахт ҳаммага ҳам насиб этавермайди.

Албатта, Рўзиқул Бердиевнинг шу даражага етишишида у кишининг отаси марҳум Саъдулла Бердиевнинг ва онаси Мелихол аянинг қолаверса, устоз ва мураббийлар, клуб мутасаддиларининг хизматлари беқиёс. Уларга минг ташаккур!

Футболчи ва мураббийлик оғир касб. Буни мухлислар ҳам яхши билишади. Узлуксиз сафарларда юриш, оила даврасида кам бўлишлик фарзандлар тарбиясига мудом эътибор қаратишга тўсқинлиқ ҳам қилади. Лўнда қилиб айтганда, оила ва ишни бақамти олиб бориш осон эмас. Шу туфайли Рўзиқул Бердиевнинг оила-аъзолари ҳам ўтган вақт мобайнида футболга мослашди, футбол билан яшади ва яшашмоқда.

Рўзиқул Бердиев ўзининг олижаноблиги, хушмуомалалиги, меҳнатсеварлиги, жонкуярлиги ва энг асосийси фидойилиги билан барчанинг бирдек ҳурмати, эъзозига савовор бўлиб келди ва бундан кейин ҳам шундай бўлиб қолишига умид қиламиз.

Бугун Рўзиқул Бердиев 41 ёшга тўлди. Биз бутун Қашқадарё футболи ишқибозлари ва сайтимиз номидан у кишини бугунги таваллуд айёми билан самимий табриклаймиз. У кишига сиҳат-саломатлик, узоқ умр ва бахт саодат тилаймиз. Оила аъзоларингиз ва фарзандаларингиз бахтига ва биз каби футбол мухлислари бахтига доимо бор бўлинг. Сиздек инсоннинг “Насаф” клубида бўлиши қалбимизда юксак ифтихор туйғуларини авж олдиради. Биз сизнинг севимли жамоамиз учун қилаётган улкан хизматларингизни қадрлаймиз ва асло унутмаймиз! Сиз бизнинг ардоқли кишиларимиздан бирисиз! Доимо соғ-саломат бўлинг! Зафарли ғалабаларда хамиша бирга бўлайлик! Ниятимиз, ҳар доим шундай мухлислар ардоғида бўлинг!

Бир гуруҳ Қашқадарёлик футбол ишқибозлари номидан www.voha.uz футбол мухлислари сайти