"Манчестер Юнайтед" дарвозабони Давид Де Хеа учун таклиф қилган янги шартнома шартлари маълум бўлди.
Daily Mirror хабарига кўра, "қизил иблислар" 32 ёшли испаниялик билан шартномани бир йилга узайтиришга ва унинг маошини деярли ярмига қисқартиришга тайёр. Агар дарвозабон клуб шартларини қабул қилса, ҳафтасига 200 минг фунт олади. Ҳозирда футболчи ҳафтасига 375 минг фунт маош олади.
Де Хеа 2011 йилнинг июлидан бери "Манчестер Юнайтед"да тўп тепади. 2022/23 йилги мавсумда у жамоа сафида барча мусобақаларда 58 та ўйинда 61 та гол ўтказиб юборди ва 25 та ўйинда дарвозаси дахлсизлигини сақлаб қолди.
Дарвозабоннинг амалдаги шартномаси 2023 йилнинг июнь ойи охиригача амал қилади.
