"Олимпик" ҳамда "Металлург" ўртасидаги Суперлиганинг 13-тур учрашувидан (1:2) сўнг меҳмон жамоа устози Веско Стешевич журналистлар саволларига жавоб берди.

- Ўйин ҳақидаги фикларингиз?
- Биринчи бўлимда тенг ўйин бўлди. Биз ҳимоядан пас орқали чиқишда кўп ҳато қиламиз. Жасур Жалолиддинов жуда чиройли гол урди. Биринчи таймда вазиятларимиз бор эди, лекин улардан фойдалана олмадик. Иккинчи таймда эса кўпроқ ҳужумга ўта бошладик. Тўғрисини айтсам, бугун ютқазмаймиз деган фикр бор эди. Касмининнинг гол урган ҳолати борасида шубҳам бор. Ҳакамлар қарорини муҳокама қилмайман. Улар текшириб кўришди ва қарор чиқаришди. Кейин яна гол урдик ва ғалаба қозондик. Йигитлар ушбу ғалабага лойиқ эди.

- Қизил карточкадан сўнг футболчиларингиз ўйинида ўзгариш қилдингизми ёки футболчилар ўзлари иштиёқ билан ўйнагани сабаб ғалабани илиб кетишдими?
- Қизил карточка танаффусдан кейин бўлди, шу сабаб мен кўп маслаҳат бера олмадим. Темиров ўйин давомида бир оз позициясини ўзгартирди. Ўринбоев бугун бизга ғалаба келтирди. Футболчилар ҳар доим ўз ҳоҳиши билан ўйин масаласини ҳал қилади.

- Ўринбоевнинг фаолиятига назар ташласак, Забиҳилло ҳар мавсумда учтадан кўп гол урмаган, лекин жорий мавсумда 12 ёки 13 ўйинидаёқ ўз номига учта гол расмийлаштириб бўлди ва кўп голларини узоқ масофадан урди. Ўринбоевга кўпроқ узоқдан зарба беришни сиз таъкидлаганмисиз?
- Узоқ масофадан яхши зарба берса, бераверсин. Мен унга кўпроқ узоқдан тепишини айтган эдим (кулади).