"Olimpik" hamda "Metallurg" o‘rtasidagi Superliganing 13-tur uchrashuvidan (1:2) so‘ng mehmon jamoa ustozi Vesko Steshevich jurnalistlar savollariga javob berdi.

- O‘yin haqidagi fiklaringiz?
- Birinchi bo‘limda teng o‘yin bo‘ldi. Biz himoyadan pas orqali chiqishda ko‘p hato qilamiz. Jasur Jaloliddinov juda chiroyli gol urdi. Birinchi taymda vaziyatlarimiz bor edi, lekin ulardan foydalana olmadik. Ikkinchi taymda esa ko‘proq hujumga o‘ta boshladik. To‘g‘risini aytsam, bugun yutqazmaymiz degan fikr bor edi. Kasmininning gol urgan holati borasida shubham bor. Hakamlar qarorini muhokama qilmayman. Ular tekshirib ko‘rishdi va qaror chiqarishdi. Keyin yana gol urdik va g‘alaba qozondik. Yigitlar ushbu g‘alabaga loyiq edi.

- Qizil kartochkadan so‘ng futbolchilaringiz o‘yinida o‘zgarish qildingizmi yoki futbolchilar o‘zlari ishtiyoq bilan o‘ynagani sabab g‘alabani ilib ketishdimi?
- Qizil kartochka tanaffusdan keyin bo‘ldi, shu sabab men ko‘p maslahat bera olmadim. Temirov o‘yin davomida bir oz pozisiyasini o‘zgartirdi. O‘rinboyev bugun bizga g‘alaba keltirdi. Futbolchilar har doim o‘z hohishi bilan o‘yin masalasini hal qiladi.

- O‘rinboyevning faoliyatiga nazar tashlasak, Zabihillo har mavsumda uchtadan ko‘p gol urmagan, lekin joriy mavsumda 12 yoki 13 o‘yinidayoq o‘z nomiga uchta gol rasmiylashtirib bo‘ldi va ko‘p gollarini uzoq masofadan urdi. O‘rinboyevga ko‘proq uzoqdan zarba berishni siz ta’kidlaganmisiz?
- Uzoq masofadan yaxshi zarba bersa, beraversin. Men unga ko‘proq uzoqdan tepishini aytgan edim (kuladi).