"Миннесота Юнайтед" "Норвич"нинг собиқ ҳужумчиси Теему Пукки билан шартнома имзолади.
Клуб матбуот хизмати хабарига кўра, шартнома 2025 йилнинг июнигача амал қилади. Финляндиялик футболчи виза ва Халқаро Трансфер Сертификатини (ITC) олгач, жамоа сафига қўшилади.
5 апрел куни "Норвич" Пукки ёзда шартномаси тугагач клубни тарк этишини маълум қилди.
Пукки "Норвич"даги беш мавсумдан сўнг "Миннесота Юнайтед" сафига қўшилди. У клуб билан Премьер-лиганинг энг яхши тўпурарларидан бири бўлган. Пукки 210 учрашувда қатнашиб, 88 гол урди ва 29 голга ассистентлик қилди.
Форвард шунингдек, “Севилья”, “Шальке”, “Селтик”, “ХИК” ва “Бреннбе” клубларида ҳам ўйнаган.
