Ўтган сўнгги 12 ой ичида кўплаб футболчиларнинг нархи осмон бўлиб кетди. Аммо яна бир гуруҳ юлдузлар нарх борасида анча арзонлади. Бунга жароҳатлар, спорт формасининг йўқолиши ва шартноманинг қисқалиги сабаб бўлди. Transfermarkt порталидан олинган маълумотлар асосида бир йил ичида энг кўп қийматсизланган футболчилар рўйхатини туздик. Қуйида шу маълумотлар келтирилади.
10. Федерико Кьеза (-21 миллион фунт)
Италия терма жамоаси аъзоси бир муддат юксакликка чиққан эди. Аммо ўтган мавсумдаги жароҳатлар ҳужумчининг ўсишига ҳалақит берди. Кьезанинг бозор нархи бир йилда 21 миллион фунтга арзонлашди. Айни дамда у 34 миллионга баҳоланмоқда. 22 ёшли футболчига "Ливерпуль" ва "Ньюкасл" қизиқиш билдирган.
9. Эндрю Робертсон (-21 миллион фунт)
"Ливерпул"нинг охирги мавсуми омадсиз кечди. Бу омадсизликда жамоа ҳимоясининг ҳам айби бор. Гарчанд 8 та ассист қайд этган бўлса ҳам, Робертсон муҳим пайтларда мерсисайд клубига ёрдам бера олмади. Бу нарса, ўз навбатида ҳимоячининг трансфер нархига ҳам таъсир ўтказганди.
8. Сон (-21 миллион фунт)
Бир пайтлар АПЛнинг энг яхши тўпурари бўлган футболчи, охирги даврда кўринмай қолди. Сон "Тоттенхэм" учун 14 та ўйинда битта гол урганди. Бу биз билган ҳужумчи эмас. Мавсум сўнггида кореялик ўзига келиб олгандек бўлди. Умид қиламизки, у янги мавсумдан яна жонланади.
7. Муҳаммад Салоҳ (-21 миллион фунт)
Футболчининг шахсий стандартларига кўра вазиятга баҳо берсак, биз ҳақиқий Салоҳни йўқотиб қўйдик. Шунга қарамай, у мавсум давомида 19 та гол ва 12 та ассист қайд этди. У бизни юқори натижаларга ўргатиб қўйганидан, унинг бир йилда 31 та голда қатнашиши омадсизликдай туюлмоқда.
6. Юри Тилеманс (-26 миллион фунт)
Бельгиялик ярим ҳимоячи "Лестер Сити"даги бошқа шериклари каби кутилгандек ўйин кўрсата олмади. Бир пайтлар ҳамманинг оғзида бўлган футболчи, "Лестер"ни қутқаришга кучи етмади. 25 ёшли футболчи эркин агент сифатида "Астон Вилла"га йўл оладиган бўлди. Янги мавсумда Тилемансдан Унаи Эмери самарали фойдаланади деган умидимиз бор.
5. Ромелу Лукаку (-26 миллион фунт)
Лукакунинг арзонловига бир қанча факторлар бор. Аввало, у "Челси"ни ижара асосида тарк этди. Қолаверса, жароҳатлар сабаб майдонга туша олмади. Ҳа, Лукаку "Интер"да 14 та гол уришга эришди. Бироқ, бу футболчининг стандарти эмас. Ҳужумчига ЕЧЛда йўл қўйган хатоси бундан кейин тинчлик бермаса керак.
4. Жейдон Санчо (-26 миллион фунт)
Эрик тен Хаг билан "МЮ" футболчилар юксала бошлади. Аммо Санчо ўзи учун барибир қийин мавсумни ўтказди. Ҳужумчи баъзи-баъзида порлаб турди. Аммо бу чақнашлар кам эди. 26 миллионлик қийматини йўқотганидан кейин, унинг клуби аллақачон Санчони сотиш ҳаракатига тушиб қолган.
3. Поль Погба (-28 миллион фунт)
Айни дамда 13 миллионга баҳоланаётган футболчини мавсум давомида жароҳатлар қийнаганди. Погба шу сабаб катта муддатни ўтказиб юборди. У биринчи тўлиқ ўйинини "Ювентус"нинг май ойидаги баҳсида ўтказди.
2. Вильфрид Ндиди (-30 миллион фунт)
Бир пайтлар АПЛнинг энг яхши ярим ҳимоячиси бўлган футболчига, жамоасининг пастга тушиб кетиши қаттиқ таъсир қилди. Ндиди 2021 йилда 51 миллионга баҳоланаётган эди. Ҳозир эса бу қиймат бор-йўғи 21 миллионни ташкил этади. Ҳа, бу мавсум "Лестер" футболчиларига катта ташвиш олиб келди.
1. Садио Мане (-39 миллион фунт)
"Ливерпул"даги фантастик мавсумлардан кейин Мане Германияга йўл олганди. Аммо у ерда ҳаммаси режадаги каби кетмади. Мане "Бавария"да асосий таркибга кириш учун қаттиқ ҳаракат қилди. Аммо буни иложи бўлмади. Ҳужумчи мавсумда жами 7 та гол урди холос. Афсуски, омад доимо кулиб боқавермайди.
ИСМАТОВ Ж.
