Садио Маненинг "Бавария"га ўтиши жуда қизиқ туюлди. Бироқ африкалик футболчининг клуб алмашганидан кейинги биринчи мавсуми омадсиз чиқди. У одатдагидан камроқ гол урди, жанжалларга дуч келди ва ёмон рейтингларга эга бўлди.
"Бавария" ўтган ёзда Мане билан шартнома имзолаган ва 30 ёшли футболчи учун 32 миллион евро тўлаган эди. Ундан ташқари сенегаллик футболчи жамоанинг энг кўп маош олувчи футболчисига айланди. Bild хабарига кўра, унга йилига 22 миллион евро миқдорида маош белгиланган. Немис клуби бошлиқлари Маненинг трансфери “Барселона”га кетган Роберт Левандовскининг йўқотилишининг ўрнини қоплашига умид қилишган. Мураббий Юлиан Нагелсман ҳатто Садиони марказий ҳужумчи сифатида ҳам ўйнатди, чунки полшалик ўрнига тўғридан-тўғри ўринбосар топилмади.
Келинг, рақамларга мурожаат қилайлик. Ўтган мавсумда Мане 38 та ўйинда 12 та гол урди ва 8 та голга ассистентлик қилди. Бир йил олдин Садио 23 та гол урган бўлса, икки йил олдин - 16, уч йил олдин - 22, тўрт йил олдин эса 26 бор рақибларни ранжитган. Янги клубга ўтиш ўйинга салбий таъсир қилди. Тўғри, ўтган мавсумда Мане оёқ суягидан жароҳат олиб, ўнга яқин учрашувни ўтказиб юборди. Худди шу сабабдан у Қатардаги жаҳон чемпионатида иштирок этмади.
Мане бир неча бор катта жанжалларнинг марказида бўлди. Март ойида у Нагелсманнга учрашув охирида майдонга туширгани учун бақирди. Табиийки, сенегаллик Юлианни "Бавария"дан ҳайдаб юборишганда уни қўллаб-қувватламади. Апрел ойида жамоада янги можаро келиб чиқди. "Ман Сити"дан учралган мағлубиятдан сўнг (0:3) Садио жамоадоши Лерой Сане билан жанжаллашиб қолди.
Натижада Мане ўйиндан четлаштирилди ва катта миқдорда жаримага тортилди. Bild хабарига кўра, африкалик номақбул хатти-ҳаракати учун 350 минг евро тўлаган. Бу эса “Бавария” тарихидаги энг катта жарима ҳисобланади. Аммо клуб Манени 2 миллион еврога жазолаши мумкин эди, чунки шартномада шундай банд ёзилган.
Садио Мане "Бавария" раҳбарларининг умидларини оқлай олмади
Мавсум охирида африкалик ESPN томонидан тузилган Бундеслиганинг энг ёмон футболчилари сафига кирди. "Бавария" афсонаси Зепп Маернинг фикрича, раҳбарият Маненинг трансферида хато қилган. “Сизнингча, Гвардиола ёки Клопп ажойиб ўйинчини 50 миллион еврога сотиши мумкинми? Йўқ, улар ҳеч қачон супер ўйинчилар билан хайрлашмайди. "Бавария" раҳбарияти яна бир бор танлаб ўтирмади ва яна ўлжага айланди. Улар "Манчестер Сити" ва "Ливерпул"га энди керак бўлмаган футболчиларни таклиф қилишди”, деди Маер.
"Бавария"даги бир мавсумда Маненинг нархи 65 миллион евродан 45 миллион еврога тушди, яъни унинг нархи 20 миллион еврога тушиб кетди. Бу "Бавария"нинг бошқа футболчиси билан бирга Бундеслиганинг барча футболчилари орасида энг ёмон натижадир. Мавсум давомида келган Томас Тухель Маненинг ўйинидан норози бўлиб, африкаликнинг кетиш эҳтимоли ҳақида гапирди. Маълум бир вақт оралиғида Мане 13 учрашувдан иборат голсиз сериясини тақдим этди. ЖЧ-2022даги танаффус ва касаллик таътилида бўлган вақтни ҳисобга олсак, Садио олти ой давомида гол ура олмади.
Томас Тухель ўтган мавсумда Маненинг ўйинидан норози эди. Ва энди Kicker Садио учун сўровноманинг қайғули натижаларини эълон қилди. Мавсум якунида нашр Бундеслига футболчилари ўртасида анъанавий овоз беришни ташкил қилди. Сўровда 250 га яқин ўйинчи иштирок этди, улардан мавсумдаги асосий омадсиз футболчини танлаш сўралган. Табиийки, анонимлик шарти билан. Мане ушбу номинацияда катта фарқ билан ғолиб чиқди - у 41,7% овоз тўплади. Иккинчи қаторда Жошуа Киммих жой олган бўлиб, унга 7,5% футболчилар овоз берган.
"Бавария" уни сотса, Мане қаерга кетиши мумкин? Ҳатто мавсум давомида сенегалликни “Наполи”га ўтказиш вариантини муҳокама қилишган. Виктор Осимхен тескари томонга эргашиши керак эди. Бироқ, бу вариант Маненинг катта маоши туфайли дарҳол бекор қилиниши мумкин эди. "Наполи" президенти Аурелио Де Лаурентис ҳеч қачон бундай пул тўламайди.
Ҳозирча, агар Мане “Бавария”ни тарк этса, демак, Премьер-лигага кетади, деган фикр бор. Қолаверса, футболчида Англияга қайтиш истаги бор. Инсайдерларнинг ёзишича, африкалик футболчига “Челси” ва “Ньюкасл” клублари қизиқмоқда. Биринчиси глобал қайта қуришни бошлади, иккинчиси эса Чемпионлар лигаси учун кучаяди. Аммо Мане Мюнхенда қолиб, фаолиятини қайта бошлашга ҳаракат қилишини истисно этиб бўлмайди.
