Хабарингиз бор, Ўзбекистон ареналари 2024-йилда бўлиб ўтадиган футзал бўйича Жаҳон чемпионатига мезбонлик қилади.
Биринчи бор юртимизда бўлиб ўтадиган мазкур мундиал Тошкент шаҳри ва бошқа шаҳарларда ташкил этилиши режалаштирилган.
Айни вақтда мамлакатимизда бўлиб турган ФИФА мутаҳассислари дастлаб Тошкент, Андижон ва Фарғона шаҳридаги спорт иншоотларини ўрганган бўлса, бугун улар Самарқанд шаҳрига ташриф буюрди.
ЎФА биринчи вице-президенти Равшан Эрматов ҳамда футзал қўмитаси раиси Жаҳонгир Усмонов бошчилигидаги ЎФА ишчи гуруҳи ФИФА вакилларини Самарқанд Шаҳридаги “Иcе Арена” мажмуасидаги барча шарт-шароитлар билан таништирди. Арена майдонини жаҳон стандардларига мос тарзда тайёрлаш ҳамда жамоаларнинг кийим алмаштириш хоналари, офислар, медиа марказ, камералар учун платформалар ва бошқа зарурий шароитлар ФИФА талабларига мувофиқ ташкил этилиши бўйича фикрлар алмашилди.
Шунингдек, делегация вакиллари Олимпия ва паралимпия спорт турларига мўлжалланган комплекс ҳамда машғулот залларини кўздан кечирди.
Режага мувофиқ, кейинги манзил Бухоро вилоятидаги спорт мажмуалари ҳисобланади. Шундан кейин ФИФА вакиллари дастлабки хулосаларини тақдим этадилар.