Англия Премьер-лигаси клублари жума, 30 июндан олдин бир анчагина харидларни амалга оширишга улгурди. Негаки, бугун норасмий трансферлар муддати якунига етади. Гарчанд трансферлар ойнасининг очилганига эндигина икки ҳафта бўлган бўлса ҳам, "Арсенал", "Манчестер Сити" ва "Тоттенхэм" каби жамоалар аллақачон йирик трансферларга қўл уришди. Бундан ташқари йирик сотувларни амалга ошириш борасида "Челси" бутун дунёни ҳайрон қолдирмоқда. Бу клуб Кай Хаверц, Калиду Кулибали, Эдуар Менди каби юлдузларини анчагина суммага сотиб юборди. Кетишнинг сўнггиси Мейсон Маунт бўлди. У 60 миллион фунт эвазига "Манчестер Юнайтед"га йўл оладиган бўлди. Ёзнинг биринчи ойида бундай юришларнинг амалга оширилиши бежиз эмас. Негаки, катта клублар ўз нишонларидан айрилиб қолишни истамайди. Шу сабабли тезкор ҳаракат қилиниб, футболчилар эркин агентга айланадиган 30 санага қадар муҳим трансферларни ҳал қилиниши лозим.
"Челси" таркибида ўтган мавсумдан йиғилиб қолган футболчилар кўпайиб кетганди. Роман Абрамовичдан кейин бошқарувга келган Тодд Боэли бир мавсумда 600 миллион фунтни трансферлар учун сарфлади. Олиб келинган футболчилар ичида энг қиммати Энцо Фернандес эди (106 миллион фунт). Ҳозир раҳбарият ақл билан иш тута бошлади. Шу сабабдан Кай Харецни 65 миллион фунтга, Мейсон Маунтни эса 60 миллионга пуллади. Қолган бир нечта йирик номлар эса Саудия Арабистонига кетди. Бу эса, ўз навбатида Почеттино учун янги харидларга йўл очади.
Ўтган бир неча кун ичида "Манчестер Сити"ни Матео Ковачичга эришганини, "Тоттенхэм" эса "Лестер"дан Жеймс Меддисонни олиб келганига гувоҳи бўлдик. Ҳали бугуннинг ўзида яна бир қанча кўчишлар кузатилиши кутилмоқда. Улар ичида "Челси"дан Лофтус-Чикни "Милан"га ўтишини, "Арсенал"нинг эса Юрриен Тимберни сотиб олишини алоҳида таъкидлаш жоиз. Шунингдек, Хаким Зиешни "Ал-Наср"га кўчиши ҳам расман тасдиқланади.
Чемпионшипга назар солганимизда ҳам бир қанча ўзгаришлар бўлиши кузатишимиз мумкин. Хусусан, "Лестер Сити" биратўласи учта харид: Закари Стеффан ("Манчестер Сити"), "Харри Винкс ("Тоттенхэм") ва Конор Коади ("Вулверхэмптон")ни сотиб оладиган бўлди.
Айтиш мумкинки, 30 июнь бу шунчаки, норасмий чегара холос. Европадаги клублар ёз давомида бемалол сотиш ва сотиб олишни амалга оширса бўлади. Бунинг учун расман 1 сентябргача рухсат берилади.
ИСМАТОВ Ж.