"Болонья"га тегишли бўлган ҳужумкор ярим ҳимоячи Риккардо Орсолини Италиянинг бошқа клубига ўтиши мумкин. Журналист Жанлука ди Марцио хабарига кўра, 26 ёшли вингерни ўз сафига Римнинг "Лацио" клуби қўшиб олишга қизиқмоқда.
Transfermarkt томонидан Орсолини 12 миллион еврога баҳоланган. Томонлар ўртасидаги амалдаги шартнома муддати 2024 йилнинг ўрталаригача ҳисобланган.
Италия чемпионатининг сўнгги мавсумида Риккардо 32 та ўйин ўтказиб, 11 та гол (3 таси пенальтидан) ва 4 та голга ассистентлик қилган.