"Байер" ярим ҳимоячиси Гранит Жака "Арсенал"ни тарк этишини тушунтирди.

“Ҳамма жойда хотиним Англияда бахтли эмаслиги ҳақида миш-мишлар тарқалди. Бу умуман ҳақиқатга тўғри келмайди.

Гап шундаки, мен инсон сифатида доим янги чақириқларга қизиқаман. Етти йилдан кейин бутунлай янги нарсаларни синаб кўришнинг вақти келганди.

Лига янги эмас, лекин клуб янги. Музокаралар давомида мен Леверкузендаги узоқ муддатли лойиҳа мантиқий эканини ва у менга 100 фоиз мос келишини ҳис қилдим", - дея футболчининг сўзларини келтиради Sky Sports.

30 ёшли футболчи билан 2028 йилгача мўлжалланган шартнома имзоланган. Олдинроқ "Байер" унинг учун 25 миллион евро тўлагани ҳақида хабарлар тарқалган эди.

Жака "Арсенал"да 2016 йилдан бери ўйнаб келмоқда. У “канонирлар” сафида 297 та ўйинда майдонга тушиб, 23 та гол урди ва 29 та голли узатмани амалга оширди.