«Барселона» ва Испания терма жамоасининг собиқ ҳимоячиси Жерар Пике Испания Қироллик футбол федерацияси томонидан жазога тортилди.

BBC маълумотига кўра, ҳозирда «Андорра» клуби ҳаммуассисларидан бири бўлган Пике ҳакам билан юз берган можаро сабаб икки ойга расмий футбол фаолиятидан четлатилди.

Ҳодиса «Андорра»нинг «Альбасете»га қарши ўйинидан кейин содир бўлган. Ушбу баҳсда Пике жамоаси 0:1 ҳисобида мағлуб бўлган. Ҳакам Алонсо де Эна Вольф баённомада ўйиндан кейин Пике унинг манзилига бир қатор кескин фикрлар билдирганини қайд этган.

Тартиб-интизом қўмитаси икки ойлик четлатишни «спорт қадриятлари ва хулқ-атвор меъёрларига путур етказувчи оммавий ҳаракатлар» билан изоҳлади.

Бундан ташқари, Пике ҳакамларга нисбатан енгил агрессия кўрсатгани билан боғлиқ ҳаракатлари учун алоҳида равишда олти ўйинга дисквалификация қилинди.

Шунингдек, «Андорра»нинг бошқа вакиллари ҳам жазоланди. Клуб президенти Ферран Виласека тўрт ойга четлатилди, спорт директори Жауме Ногес ҳам дисквалификация олди.

Жерар Пике футболчилик фаолиятини 2022 йилда якунлаган. У «Барселона» сафида тўққиз марта Ла Лига ғолиби бўлган ва уч бор Чемпионлар лигасини ютиб олган. Испания терма жамоаси билан эса 2010 йилги Жаҳон чемпионати ва 2012 йилги Европа чемпионатида зафар қучган.