"Манчестер Юнайтед" Мейсон Маунт учун 60 миллион фунт сарфлади. Бу қиймат клуб тарихидаги энг қимматларидан биридир. Аммо энг қиммати эмас. Яқин тарихда "қизил иблислар" ундан ҳам қимматроқ харидларни амалга оширган. Маунтдан ҳам катта пулга олинган футболчилар сони бешта. Аммо уларни ӯта муваффақиятли дея олмаймиз. Шу сабабли, 24 ёшли футболчи улардан кўра жамоага яхшироқ фойда келтиришга интилади.
Масалан, манкунианликлар тарихидаги энг қимматга олинган Поль Погбага эътибор қаратайлик. Ярим ҳимоячи 2016 йилда "Олд Траффорд"га қайтади. Аммо бу қайтиш "МЮ" учун нақ 89 миллион фунтга тушган. Погба Фергюсон даврида "Ювентус"га сотиб юборилганди. Афсуски, франциялик жаҳон чемпиони, ўз номини оқлай олмади. У клуб тарихидаги энг қиммат футболчи номига лойиқ ҳаракат қилмади. Олти йиллик давр ва шон-шуҳратсиз Погба эркин агент сифатида "Ювентус"га қайтиб келди. Афсус.
"Қизил иблислар"нинг иккинчи энг қиммат ўйинчиси Эрик тен Хаг даврида сотиб олинади. "Аякс" ҳужумчиси Антони катта потенциалга эга футболчи сифатида олиб келинди (82 миллион фунт). Унинг дебют мавсумини унчалик ҳам омадли деб бўлмайди. Аммо 22 ёшли бразилияликка ҳали кўп имконият берилади.
Агар сиз 2019 йилда бирор бир "МЮ" мухлисига 85 миллионга сотиб олинаётган Харри Магуайр жамоа сардори бўлади деганингизда, улар хурсанд бўлган бўларди, албатта. Афсуски, сўнгги мавсумларда намойиш этилган омадсиз ўйинлар Магуайрни клуб тарихидаги энг муваффақиятсиз футболчилардан бирига айлантирди. Магуайр каби Лукаку ҳам аввалига ажойиб ўйин намойиш этганди. Аммо мураббий алмашиши ҳужумчини захирага михлаб қўйди. Сульшер даврида бельгиялик "Интер"га сотиб юборилади.
Жейдон Санчо 73 миллион фунт эвазига олиб келинганди. У ҳам Антонига ўхшаб ўзига керак бўлган барқарорликни топа олмаяпти. Уни шу ёзнинг ўзида сотишлари мумкин.
Маунтдан қимматроққа олинган бешинчи вакил бу Каземиродир (60+10 миллион фунт). Бразилиялик таянч ярим ҳимоячиси ўтган мавсумнинг энг яхшилари қаторида эди. Иккита қизил карточкасини ҳисобга олмаганда, Каземирони барқарорлик намунаси дейиш мумкин. Тен Хаг бу юриши билан кучли ақл-заковат кўрсатганди.
Мейсон Маунтдан арзонроққа сотиб олинган футболчилар ҳам бор. Улардан бири бири – Анхель Ди Мария. У 59.7 миллион фунтга "Реал"дан олиб келинади. Бир мавсум ичида аргентиналик тақдирга тан бериб, "ПСЖ"га кетиб қолган эди.
Шунингдек, Фред ва Бруну Фернандешлар 52 миллиондан харид қилинган. Уларнинг қай бири омадли ёки акси эканини ўз ҳукмингизга қолдирамиз.
ИСМАТОВ Ж.
