Мавсум бошида «Андижон» сафига қўшилган тожикистонлик футболчи Ахтам Назаров андижонликлар сафни тарк этди. Жамоа у билан шартнома бекор қилди.

Гап шундаки, у оилавий шароитига кўра, клуб раҳбариятига мурожаат қилди ва икки томон ўзаро келишган ҳолда дўстона равишда хайрлашдилар.

Боиси, Назаров ҳозир оиласига яқин бўлиши зарурлиги инобатга олинди. Чунки футболчининг ёш қизи икки марта операция столига ётишига тўғри келди. Шу сабаб туфайли у оиласи билан бирга бўлишини сўраб мурожаат қилган ва буни жамоа раҳбарияти тўғри тушунди.

Ахтам билан меҳнат шартномаси 2024 йилнинг 31 декабргача мўлжалланганди. Эндиликда икки томоннинг келишувига кўра битим ўз кучини йўқотди. Барча ҳужжатларни расмийлаштириш бугун охирига етказилди.

Назаров “Андижон” сафида Суперлигада 5 та ва Ўзбекистон Кубогида 1 та учрашувда иштирок этди.

“Андижон” матбуот хизмати.