Кеча, 1 ноябрь куни Ўзбекистон ёшлар терма жамоаси Дубай шаҳридан Осиё чемпионати бўлби ўтадиган Рас ал-Хайма шаҳрига кўчиб ўтди.

Хабарингиз бор, терма жамоа аъзолари 29 октябрь куни БААга етиб бориб, уч ярим кун давомида машғулотларни олиб боришди ва "Арсенал" футбол клубининг БААдаги академияси билан назорат учрашувини ўтказиб, 12:0 ҳисобида ғалаба қозонишди.

БААнинг Рас ал-Хайма ва "Фужейра" шаҳарларида 3-17 ноябрь кунлари 19 ёшгача бўлган ёшлар ўртасида Осиё чемпионати бўлиб ўтади. Икки соатли сафардан кейин Ўзбекистон терма жамоаси делегацияси Рас ал-Хайма шаҳридаги "Мангроув Отел" меҳмонхонасига жойлашишди. Ушбу меҳмонхонада "С" гуруҳининг бошқа жамоалари — Вьетнам, Иордания, КХДР, шунингдек, "А" гуруҳининг БАА, Япония, Эрон ва Кувайт терма жамоалари жойлашишган. Меҳмонхонада вакилларимизни ташкилий қўмита аъзоларидан ташқари Эрон терма жамоаси аъзолари илиқ кутиб олишди. Гап шундаки, Ўзбекистон ва Эрон ёшлар терма жамоалари шу кунгача ўзаро бир неча марта тўқнаш келишган. Улар ўтган йили Эронда бўлиб ўтган саралаш баҳслари, Вьетнамдаги ташкил этилган халқаро турнир ва юртимизда ўтказилган ўртоқлик учрашувлари доирасида бир неча марта рўбарў келиб, яхши таниш бўлиб кетишган.

Бугун мусобақанинг расмий қисми бошланади. Жамоалар менежерлари иштирокида йиғилиш бўлиб ўтади ва ундан сўнг бош мураббийлар матбуот анжуманида иштирок этишади. "С" гуруҳи вакиллари иштирокидаги матбуот анжумани маҳаллий вақт билан соат 11:00дан 11:30гача ташкиллаштирилади.

Эслатиб ўтамиз, қитъа чемпионати эртага БАА ва Кувайт терма жамоалари ўртасидаги баҳс билан бошланади. Бу ўйин "Эмирейтс" стадионида соат 18:00да (Тошкент вақти билан) бошланади. Ўзбекистон терма жамоаси эса ўзининг дастлабки баҳсини 4 ноябрь куни соат 22:00да Вьетнамга қарши ўтказади.