2010 йилларнинг аввалида "Арсенал" молиявий жиҳатдан қийин аҳволга тушиб қолади. Ўшанда Арсен Венгер шундай деган эди: "Биз ҳозир 50 миллион фунтлик футболчиларни харид қила олмаймиз. Қурбимиз бунга етмайди. Бу – факт!"
Орадан 12 йил ўтди ва "Арсенал"даги молиявий аҳвол бутунлай ўзгарди. Ўша 2011 йилда Венгер сотиб олган Микель Артета, 2023 йилнинг ёзида 3 та футболчи учун 200 миллион фунтдан кўп сарфлади. Юрриен Тимбер (40 миллион фунт), Кай Хаверц (65 миллион фунт) ва Деклан Райс (105 миллион фунт) ўтган мавсумнинг 248 кунида АПЛ етакчиси бўлган жамоага қўшилди. Гарчанд катта харажат қилинган бўлса ҳам, ҳали "Арсенал"нинг ёзги харидлари тугади деб бўлмайди. Қуйида Микель Артета ва унинг жамоаси, янги мавсум бошлангунга қадар амалга ошириши керак бўлган ишлар қайд этилади.
Таркибни тартибга келтириш
Умуман олганда, ҳозирга қадар "Арсенал" Молиявий Фейр плей қоидаларидан четга чиққани йўқ. Шунга қарамай, иқтисодий барқарорликни сақлаб қолиш зарур. Бунинг учун қилинган харажатларни айрим сотувлардан келган пуллар билан қоплаш керак. Шу мақсадда Томас Парти сотувга қўйилмоқда. Ганалик футболчи эвазига яхши таклиф билдирадиган клуб қидирилмоқда. У 2020 йилда "Атлетико"дан 45 миллион фунт эвазига сотиб олинган эди. Унга Саудиядан таклифлар борлиги айтилган. Бундан олдин Гранит Жака "Байер Леверкузен"га 20 миллиондан қимматроқ нархда сотилганди. Шунингдек, ҳимоячи Киран Тирни учун ҳам таклифлар эшитилади. Унга "Ньюкасл" қизиқиш билдирган. Агарда Тирни сотилса, унинг ўрни ким биландир тўлдирилиши керак. Бу эса таркибни тартибга келтириш заруратини вужудга келтиради.
Марказий ҳужумчилар борасида бир қарорга келиш
Микель Артета мавсумолди ўйинларига учта ҳужумчи билан йўл олганди. Бу эса бош мураббий олдида янги муаммони вужудга келтиради. Артета улар ўртасида танлов қилиши керак. Улар ичида 26 ёшли ҳужумчи Жезус энг тажрибали вакил саналади. Балогун эса ўтган мавсумни "Реймс"да фантастик даражада ажойиб ўтказган эди. Шу сабабли уни яхши нархга сотиш энг яхши танлов бўлган бўларди. "Арсенал" ўз тарбияланувчисига 30 миллион фунтдан баланд нарх қўйган.
Жезус жароҳатда эканида, Нкетиа катта майдонга чиққанди. Шундай экан, захира варианти сифатида ундан яхшироқ номзод топиш қийин.
Ярим ҳимояни мустаҳкамлаш
Артетанинг ярим ҳимояси ҳали ҳам тўлиқ қурилгани йўқ. Агарда Томас Парти кетадиган бўлса, майдон маркази учун яна бир харидни амалга ошириш керак бўлади. "Арсенал" бу борада аллақачон ҳаракатларини бошлаб юборган. Тўпчилар "Саутгемптон" ярим ҳимоячиси Ромео Лавияга қизиқиш билдирмоқда. Бироқ, бу борада Лондон клуби ёлғиз бўлмайди. Негаки, 19 ёшли футболчига "Ливерпуль", "МЮ" ва "Ньюкасл" ҳам даъвогар саналади. Лавия эса айни дамда 50 миллион фунтга баҳоланмоқда.
Букайо Сакага ўринбосар топиш
"Арсенал" сўнгги икки йил давомида ўзининг АПЛ ўйинларини Букайо Сакасиз ўтказмади. Саканинг чидамли ва барқарор экани, уни энг қийматли футболчилардан бирига айлантирди. Бироқ, гигант клублар бир футболчига боғланиб қолмаслиги керак. Боз устига, Сака 21 ёшда ва унинг етакчилик борасидаги тажрибаси ҳали етарли эмас. Шу сабаб уни ротация қилишга қодир вакил зарур. Бу борада "Байер Леверкузен" ҳужумчиси Мусса Диаби ажойиб танлов бўлган бўларди. 24 ёшли вингерни 45 миллион фунтга сотиб олиш мумкин. Ҳа, у "Арсенал"да Сакадан кейинги ном сифатида кўрилади. Бироқ, Диаби учун ЕЧЛ футболи жуда ҳам муҳим фактордир. Бу имконият эса "Арсенал"да мавжуд.
ИСМАТОВ Ж.
