"Бухоро" бош мураббийи Улуғбек Бақоев Ўзбекистон кубогининг нимчорак финал босқичи доирасида бўлиб ўтган "Насаф"га қарши ўйин (3:4) борасида ўз фикрлари билан ўртоқлашди.

— Гувоҳи бўлганингиздек, бугун қизиқарли ўйин бўлиб ўтди. «Насаф» амалдаги кубок соҳиби ва юқори мақсадларга эга бўлган жамоа. Қанотлардан яхши ҳаракатланади ва шу туфайли бугун бош билан 4-та гол ўтказиб юбордик. Мухлисларга бугунги ўйин ёқди деб ўйлайман. Кучли жамоага муносиб қаршилик кўрсатган ўз футболчиларимга ўйин учун миннатдорчилик билдираман. «Насаф» жамоасини кейинги босқич йўлланмаси билан табриклайман.

— «Бухоро» жамосининг мақсадлари қандай?
— Жамоамиз кубокда узоқроққа боришни мақсад қилган эди, энди бор эътиборимизни лигадаги ўрнимизни сақлаб қолишга ҳаракат қиламиз.

— Иккинчи давра олдидан бир қатор янги футболчилар жамоага жалб қилинди, умуман олганда ўзингиз истаган барча футболчиларни олиб келдингизми?
— Йўқ. Имкон қадар фойдаландик. 70% ўзим истаган йигитларни олиб келдим. Бу борада регламент ҳам бор эди. Асосан U-20 ўйинчиларини олиб келдик. Ёшларга ўзини кўрсатиши учун имконият берамиз. "Насаф" клубидан ҳам 2 нафар ёш ўйинчилар таклиф этилди.

— "Турон" билан ўйиндаги "Бухоро"дан бугун бутунлай бошқа жамоани кўрдик. Ўтган турдаги ўйиндан қандай хулосалар олинди?
— Бухородаги ўйинда биз 15-дақиқадан бошлаб бир киши кам бўлиб ҳаракатландик. Аввалги учрашувда ҳам охирги дақиқаларда тўп ўтказиб юбордик ва бугун ҳам. Жамоамизда концентрация етишмаяпти, бу борада ҳам ишлар олиб борамиз.