"Саутгемптон" ҳимоячиси Валентино Ливраменто "Ньюкасл"га 50 миллион евро эвазига ўтади, дея хабар бермоқда The Athletic нашри.
Манбанинг хабарига кўра, клублар ўртасидаги музокаралар июнь ойида бошланган ва унинг аввалги клуби Лондоннинг "Челси" жамоасига етарлича катта товон пули тўлаш зарурлиги туфайли мураккаблашган.
20 ёшли футболчи 2021 йилда "Саутгемптон" билан 5,9 миллион евро эвазига шартнома имзолаган эди. Валентино "авлиёлар" сафидаги илк мавсумида барча турнирларда 32та ўйинда майдонга тушиб, 1та гол урди ва битта голли узатмани амалга оширди.
"Челси" тарбияланувчиси 2022 йилнинг апрель ойида тиззасидан олган жиддий жароҳати туфайли деярли бутун ўтган мавсумни ўтказиб юборди. 2022/2023 йилги мавсумда Валентино Ливраменто атиги икки марта майдонга тушди.
