Неймар "Барселона"даги 4 йиллик фаолияти давомида дунёнинг энг яхши ҳужумчиларидан бирига айланади. У 2013 йилда "Сантос"дан харид қилинганди. 2017 йилда бразилиялик футболчи рекорд сумма эвазига "ПСЖ"га сотилади. Сотувдан тушган 222 миллион еврони "Барселона" янги трансферларга ишлатади. Қуйида Неймар ўрнига сотиб олган 5 футболчини билиб оласиз.
Усмон Дембеле
Дембеле 2017 йилда харид қилинган беш футболчининг энг қиммати эди. У "Боруссия Дортмунд"дан 96.8 миллион фунт эвазига сотиб олинади. Афсуски, ёш футболчи қарийб беш йил давомида жароҳатлардан қийналди. 26 ёшли вингер 2021 йилдан бошлаб ўз формасини тиклай бошлади. Хави даврида унга янги битим таклиф этилди. Ўтган мавсумда Дембеле янада ёрқинроқ намоён бўлди ва "Барса"ни чемпион қилишда фаол қатнашди. Афсуски, уни жароҳатлар ҳалиям таъқиб қиларди. Айни дамда Дембеле "ПСЖ"га ўтиш бўсағасида турибди. Унинг кетиши аллақачон Хави томонидан тасдиқланган. Умид қиламизки, Дембеле Парижда янада юксалади.
Паулиньо
"Барселона"нинг 2017 йилда Паулиньони сотиб олиши, катта танқидларга сабаб бўлади. Собиқ "Тоттенхэм" футболчиси эвазига каталонияликлар Хитойнинг "Гуанжоу" клубига 36 миллион фунт тўлаб беради. 2017/18 йилги мавсумда бразилиялик ярим ҳимоячи 9 та голга муаллифлик қилади. Унинг бир мавсумлик хизматлари "Барселона"га Ла-лига ва мамлакат кубогини ютишда катта ёрдам берганди. Паулиньо яна "Гуанжоу"га қайтиб, 2019 йилда Хитой чемпионига айланади. 33 ёшли футболчи 2021 йилда "Ал-Аҳли" сафига эркин агент сифатида келган. Аммо бир неча ойлардан кейин, шартномасини муддатидан олдин тугатиб, Бразилияга қайтиб кетади. У ҳозир "Коринтианс" сафида ҳаракат қилмоқда.
Нелсон Семеду
Семеду 2017 йилда "Бенфика"дан сотиб олинади. У жамоада Дани Алвеш ўрнини эгаллаши тахмин қилинганди. Қанот ҳимоячиси "Барселона"да жами 124 та ўйин ўтказади. Бу даврда Семеду 2 та мамлакат чемпионлигини, бир марта эса кубокни қўлга киритган. 2020 йилда португалиялик футболчи "Вулверхэмптон"га 27.6 миллион фунт эвазига сотиб юборилганди. Семеду АПЛдаги дебют мавсумини қийин ўтказди. 2022 йилда унинг оёғи жарроҳлик амалиётидан ўтган. Ўтган мавсум Нелсон учун асосан захира даври эди.
Жерар Деулофеу
Деулофеу "Барса" тарбияланувчиси саналади. У 2015 йилда сотиб юборилади. 2017 йилда "Барселона" ҳимоячини қайта сотиб олиш ҳуқуқини ишга солади. 2018 йилдаги Коутиньонинг келиши, испаниялик футболчини сотилишига олиб келган. У "Уотфорд"га трансфер қилинади.
2020 йилда "буғулар" Чемпионшипга тушиб кетгач, футболчи "Удинезе"га кўчиб ўтади.
Марлон Сантос
Марлон 2016 йилда "Барселона" томонидан ижарага олинади. "Флуминенсе"дан келган футболчи, Б жамоада ҳаракат қила бошлади. Марказий ҳимоячи кейинги мавсумда 5 миллион еврога сотиб олинади ва "Ницца"га ижарага берилади. 2018 йилда Сантос 6 миллион евро эвазига "Сассуоло"га сотилган. Орадан уч йил ўтгач, Сантос "Шахтёр Донецк" сафига кетади. 2022 йилда уни "Монза" сотиб олган. Негаки, бразилияликни Украинадаги уруш ташвишга солиб қўйганди.
ИСМАТОВ Ж.
