Дзюдочимиз Диёра Келдиёрова фаолиятида иккинчи бор «Мастерс» сериясига кирувчи мусобақанинг совриндорига айланди. Венгрия мезбонлик қилаётган турнирда иштирок этган ҳамюртимиз бронза медалига эга чиқди.

Дзюдочимиз учинчи ўрин учун кечган баҳсда буюк британиялик Челси Жайлсни атиги 45 сония ичида мағлуб этди.

Ҳамюртимиз кечаги кун давомида дастлаб жанубий кореялик рақибасидан устун келган бўлса, иккинчи даврада озарбайжонлик дзюдочини мағлубиятга учратди. Афсуски, у чорак финалда мезбонлар вакиласи Река Пупга имкониятни бой бериб қўйди. Ўтиш босқичида германиялик Маша Баллхаус мағлуб этилгач, Келдиёрова шоҳсупага кўтарилиш имкониятини сақлаб қолиб, бронза медаль учун жангни ўз фойдасига ҳал этган.

Ушбу ғалаба Келдиёровага жаҳон ва Олимпиада рейтинги учун 900 очкони тақдим қилади. Эслатиб ўтамиз, спортчимиз 2019 йил Хитой мезбонлик қилган «Мастерс» мусобақасида илк бор шоҳсупага кўтарилган эди.