Жаҳон чемпионатига саралаш мусобақасининг Осиё минтақасида эртага навбатдаги учрашувлар бўлиб ўтади. Ўзбекистон билан бир гуруҳдан ўрин олган Қатар ва Ливан терма жамоалари ҳам бу турда ҳисоб-китоб қилиб олишади. Учрашувдан олдин ташкил қилинган матбуот анжуманида қатарликлар бош мураббийи Пауло Аутори иштирок этди. Аутори жамоаси фақатгина ғалаба учун майдонга чиқишини таъкидлаб ўтди.

«Бизнинг футболчилар ғалаба қозониш учун жуда катта иштиёқ бор. Улар бунинг учун нима қилиш кераклигини яхши билишади. Шогирдларим Ливанга қарши 100 фоиз тайёр. Рақиб жуда кучли терма жамоа. Унда ҳақиқий профессионал футболчилар тўп суришади».

«Биз бу учрашувда фақат ғалаба учун майдонга чиқамиз. Бунинг учун бизда имконият яхшироқ. Агар мағлубиятга учрасак ҳам хаёт тўхтаб қолмайди. Биз реалистмиз ва улар ғалабага муносиб ўйнаб ютса буни ҳам тан олишни биламиз», дея Пауло Ауторининг сўзларидан иқтибос келтирмоқда ОФК расмий сайти.