"Манчестер Юнайтед" янги қўшилган Расмус Хёйлуннни 3 сентябрь куни "Арсенал"га қарши АПЛнинг 4-тури доирасидаги ўйинда дебют қилишни режалаштирмоқда.
20 ёшли даниялик футболчи ўтган ҳафтада "Аталанта"дан "Манчестер Юнайтед"га ўтган эди. Кейинчалик маълум бўлишича, футболчининг бел қисмидаги енгил жароҳати бор, бу эса бир неча ҳафталик реабилитацияни талаб қилади.
Хёйлунн ҳозирда индивидуал дастур бўйича машғулот ўтказмоқда, сешанба куни у клубнинг Каррингтондаги базасида югуриш машқларини бажарди. Клуб ходимлари Расмус бир ойдан камроқ вақт ичида "Арсенал"га қарши сафарда бўлиб ўтадиган ўйинга тайёр бўлишига умид қилмоқда.
