Сўнгги йилларда компьютер технологиясининг ривожланиши натижасида ўйинларни таҳлил қилиш, нафақат таҳлил, балки натижаларни аниқроқ тахмин қилиш имконияти пайдо бўлди. Бу тахмин шунчаки қилинмайди. Тахминлар одатда кучли ҳисоб-китоб ва жамоаларнинг майдондаги ҳаракатларига асосланади. Opta портали ҳам ўзининг энг кучли суперкомпьютерини ишга солган ҳолда АПЛнинг янги мавсуми учун хулосаларини берди. Барча 20 та жамоанинг натижалари ва тақвими 10 минг марта кўрикдан ўтказилиб, тахминлар билдирилган.
Тарихда требл қайд этган иккинчи, ЕЧЛни ютган 10 клуб сифатида "Манчестер Сити 2023/24 йилги мавсумда ҳам Англия чемпиони бўлиш учун энг ашаддий даъвогар сифатида кўрилмоқда. Opta'га кўра, "шаҳарликлар"нинг чемпион бўлиш эҳтимоли 90.2 фоизга тенг. Бу нарса эса АПЛни борган сари бир жамоа гегемонлигига асосланган лига бўлиб бораётганини англатади. Таққослаш учун Германияда "Бавария"нинг бу борадаги имкониятлари 69.3 фоизни, Францияда эса "ПСЖ"нинг кўрсаткичи 57.3 фоизни ташкил этади. Шунингдек, "Реал" 48.4 фоиз, "Интер" эса 43.6 фоиз эҳтимол билан мос равишда Испания ва Италияда фаворит мақомида турибди.
"Арсенал" ўтган мавсумда 248 кун давомида АПЛда етакчи эди. Бироқ 2024 йилда Лондон клубининг чемпион бўлиш имконияти бор-йўғи 4.1 фоизга тенг холос. Бу борада "Ливерпул"да 3.5 фоиз, "МЮ"да эса 1.7 фоизлик эҳтимолий ғолиблик бор.
Тахминий АПЛ жадвалининг пастки қисмидаги вазият ҳам мавжуд. Суперкомпьютер лигани тарк этадиган жамоалар қаторида аввало "Лутон Таун"ни кўрсатган. Бу клуб 62.3 фоизлик Чемпионшипга тушиб кетиш эҳтимолига эга. Шунингдек, АПЛнинг яна бир дебютанти бўлган "Шеффилд Юнайтед" ҳам иккинчи ўринда АПЛдан кетишга даъвогарлар қаторида эътироф этилади. Учинчи ва сўнгги клуб "Борнмут"дир. Ўтган мавсумда бир амаллаб хавфли зонадан чиқиб олган клуб ҳам 2024 йилда Чемпионшипга равона бўлади деб ҳисобланмоқда.
"Олчалар" ўтган мавсум ўртасида Гари О'Нейлни Андони Ираолага алмаштирган эди. Кўпчилик мутахассислар ва букмейкерлик компаниялари "Борнмут"ни АПЛдан тушиб кетади деб ўйлаганди. Аммо бундай бўлмади. Шунга қарамай, янги мавсум якунида Opta суперкомпьютери бу жамоани АПЛда қолмаслигини билдирди. Чемпионшип ғолиби сифатида АПЛга қайтган "Бёрнли" клуби 2023/24 йил сўнггида 15 ўринда бўлади деб тахмин қилинди. Венсен Компани жамоаси нисбатан кучли деб ҳисобланмоқда. Бу клуб "Эвертон" ва "Ноттингем Форест"дан кўра АПЛда қолишга лойиқроқ кўрилган.
Юқоридаги тахминларни тез орада бошланадиган мавсум қанчалик тўғри эканини кўрсатиб беради.
ИСМАТОВ Ж.
