Россия Федерал суд ижрочилари хизмати "Зенит"нинг собиқ футболчиси Малкомни қидирувга қўйишга қарор қилди. Бу ҳақда "Муткога қарши" телеграм канали хабар бермоқда.
Қайд этилишича, Малком Россиядан Саудия Арабистонига йўл ҳаракати қоидаларини бузганлик учун жарима сифатида 64 минг рубл тўламай кетган. ФССП тегишли материалларни олди ва футболчини қидирувга берди.
Энди Малкомнинг Россиядаги банк ҳисоблари пул маблағлари ечиб олинмагунча блокланиши мумкин. Қолаверса, футболчи Россия чегарасида муаммоларга дуч келиши мумкин.
Эслатиб ўтамиз, Малком ёзги трансфер ойнасида "Зенит"дан "Ал-Ҳилол"га ўтган эди. Трансфер суммаси 60 миллион еврони ташкил қилди.
