«Порту» ярим ҳимоячиси Отавио Арабистоннинг «Ан-Наср» клубига кўчиб ўтди. Энди у Криштиану Роналду билан биргаликда фаолият олиб боради.

Машҳур журналист Фабрицио Романонинг хабар беришича, Ар-Риёд клуби Португалия грандига 60 миллион евро беришга рози бўлган.

Маълум қилинишича, араб жамоаси ушбу суммани бир неча қисмга бўлиб тўлайди. Ўйинчи энди тиббий кўрикдан ўтиши керак, бу «аждарлар» учун рекорд сумма бўлади.

Эслатиб ўтамиз, Отавио «Порту»да 2014 йилдан буён ўйнаб келмоқда, у барча турнирларда 282 та ўйин ўтказиб, 31 та гол урган.

Португалия терма жамоаси футболчисининг «Ан-Наср»даги шериклари Криштиану Роналду, Садио Мане, Марсело Брозович, Алекс Теллес, Секо Фофана ва Талиска бўлади.