«Пахтакор» ва «Бухоро» ўйинидан кейин тошкентликлар бош мураббийи Мурод Исмоилов ўйин борасида фикрларини билдириб ўтди.
«Ўйин ҳақида гапиришни хоҳламасдим. Лекин мухлисларни табриклашни хоҳлайман. Йил давомида жуда мураккаб учрашувлар, мураккаб вазиятлар юзага келди. Лекин клубнинг ҳар бир ходими, футболчилари бу вазиятларда бир тан-у бир жон бўлиб ҳаракат қилгани сабаб чемпионликка эриша олдик. Бизни ёритиб борган журналистларимизга ҳам раҳмат айтмоқчиман».
«Ҳатто иккинчи гол киритилган вазиятда ҳам ҳали чемпионликка эришганимизга ишонганим йўқ. Чунки «Машъал»да вазият қанақа бўлаётганини билмасдик. Аммо учинчи голдан кейин барчаси ҳал бўлганини, биз чемпион бўлганимизга ишондим».
«Энди шанба куни кубок учрашувига бор эътиборимизни қаратамиз. Мақсад битта кубок финалига чиқиш. Албатта бугунги Кримецнинг қизил карточка олиши катта йўқотиш бўлади. Бироқ «Пахтакор» битта футболчига қараб қолган эмас. унинг ўрнида Акбар Исматуллаев, Владимир Козак ўйнаши мумкин. Умуман унинг ўрнини тўлдиришга ҳаракат қиламиз».
«Бу йилги чемпионат мен учун қизиқарли ўтди. Чемпионлик учун ҳар бир учрашувда курашишга тўғри келди. Ҳар бир учрашув оғир кечганини айтиб ўтишим керак».
«Кейинги мавсум? Бу борада бир нарса дея олмайман. Сабаби ҳали жамоада қоламанми йўқми бу ҳал бўлгани йўқ. Мен бу ерда тўлиқ бош мураббий ҳам эмасман. Ким билан иш давом этади, бунисини клуб раҳбарлари ҳал қилишади», дея фикрларини изҳор қилди Исмоилов.