Эртага Ўзбекистон суперкубоги доирасида «Пахтакор» ҳамда «Насаф» жамоалари ўртасидаги баҳс бўлиб ўтади. 

Учрашув олдидан қаршиликлар устози Рўзиқул Бердиев матбуот анжуманининг иккинчи қисмида иштирок этди ва ўз фикрларини билдирди. 

«Эртанги ўйинда фаворит йўқ деб ҳисоблайман. Иккала жамоа ҳам бор кучини ишга солиши аниқ. Фақат вазиятлардан унумли фойдаланиш муаммоси панд бермайди деган умиддаман. Бош мақсадимиз бир - яна бир совринни қўлга киритиш.

Ҳозир икки клубни ҳам бир хил даражада дейиш мумкин. Чемпионат ҳамда кубок баҳслари, шунингдек, халқаро майдонда ҳам бизни қийин баҳслар кутиб турибди. Ҳар бир мусобақага бир хил кучни ташлаш учун максимал ишлаймиз. Эртанги баҳснинг муҳимлигини тушуниб турибмиз ва мураббий айтган кўрсатмаларни керакли кўламда бажарамиз. Ўз кучимизга ишонч юқори. Бу принципиал баҳс. Кучли жамоа ғалаба қозонади. Албатта, ўша клуб биз бўламиз.

Мураббий ўз истеъфоси ҳақидаги миш-мишларга фикр билдирди.

Истеъфо ҳар бир мураббийнинг тақдирида бор нарса. Эртами кечми бу содир бўлади. Лекин менинг бугун бу ҳақда ўйлашга ҳаққим йўқ. Қачон ишдан кетишимдан қатъий назар мавсум олдидаги режаларни бажаришга катта урғу бераман. Нима бўлган тақдирда ҳам қилган ишимдан фахрланаман. Ҳаммасини «Насаф» ва унинг содиқ мухлислари учун қилганман.

Натижа, бу соврин ҳозир ҳаммага муҳим. Тактик юришлар кучли бўлади деб ўйлаяпман. Кичик деталларга ҳам эътибор бериш талаб этилади. Зеро, аввалги баҳсларда бўлгани каби бу ҳам оёқдан чалиб қолмаслиги зарур. Чунки ҳар икки жамоа бир-бирини жуда яхши билади.

Ҳужумчи муаммоси ўтган йил ҳам кузатиларди. Бироқ энди Норчаев кетгач, бу муаммо яна ҳам кескинлашиб кетди. Янги ҳужумчилар олдик. Муаммони ечиш мақсадида легионерларга суяндик. Машгулотда ишламоқдамиз. Шунга қарамай муаммонинг ўзгариши қийин бўляпти», – деди Бердиев.