"Манчестер Сити" ҳимоячиси Эмерик Лапорт "Ан-Наср"га ўтиши муносабати билан клуб мухлисларига мурожаат қилди.
29 ёшли испаниялик футболчи ижтимоий тармоқларда “Манчестер Сити”даги фаолиятидаги энг муҳим воқеалар акс этган видеони жойлаштирди.
“Унутилмас беш ярим йил давом этди. Қалбимда абадий сақлайдиган жуда кўп хотиралар. Ижобий фикр юритиш ҳар доим осон: совринлар, ғалабалар, голлар, курашлар ва Премер-лигадаги йирик ўйинлар. Аммо мен ёмон томонларини ҳам эслайман: жароҳатлар ва йўқотишлар, мағлубиятлар ва хатоларим.
Кубоклардан муваффақиятсизликларгача, ғалабалардан жароҳатларгача буларнинг барчаси менинг саёҳатимнинг бир қисми бўлди ва мен бугунги кундаги кимлигимни шакллантирган ҳар бир лаҳза учун жуда миннатдорман.
Бу либосни кийиш мен учун шараф ва завқ эди, бунинг учун мени эслайсиз деган умиддаман. Ҳаммаси учун яна бир бор раҳмат. Келажакда омад тилайман ва сизларни доим кузатиб бораман", - деб ёзган Лапорт.
Олдинроқ ҳимоячи "Ан-Наср" билан 2026 йилгача мўлжалланган шартнома имзолаши ҳақида хабар берилганди. Унинг маоши йилига 25 миллион еврони ташкил қилади.
