Дарвозабон Кепа Арризабалага "Реал" сафидаги илк ўйинини ўтказди.

Лондоннинг “Челси” клубидан ижарага олинган 28 ёшли испаниялик футболчи Ла Лиганинг 3-турида “Сельта”га қарши ўйинда “қаймоқранглилар” дарвозаси дахлсизлигини сақлаб қолди. Карло Анчелотти шогирдлари 81-дақиқада Жуд Беллингемнинг аниқ зарбаси эвазига минимал ғалабага эришди.

“Бу қийин ўйин бўлди. Рақиб ўз уйида ўйнади, шунинг учун у фаол равишда босим ўтказишга ҳаракат қилди. Ўйинни иложи борича хотиржам ўйнашга ҳаракат қилдим.

Айни дамда мен жамоанинг сўнгги ўйинчисиман, лекин бора-бора ўзимга ишонч ортиб бормоқда. Ўйинда ўз дарвозаси дахлсизлигини сақлаб қолиш ва ғалаба қозониш ёқимли”, - деди Кепа.