"Бухоро" - "Насаф" ўйини арафасида "Бухоро" клуби мухлислари сайти жамоа марказий ҳимоячиси Георги Квесиашвилидан қисқача интервью олди.

— Ташқаридан кузатганда жамоа хотиржам шуғулланмоқда. Жамоа мавсумдаги муҳим ўйинлардан бирини ўтказиш арафасида турибди. Ярим финал олдидан нималарни ҳис қиляпсиз? Кайфиятингиз қандай?
— Ўзимизни бўшашган ҳис қилмаяпмиз. Тўлиқ куч билан шуғулланяпмиз ва "Насаф"га қарши кечадиган муҳим ўйинга тайёргарлик кўряпмиз. Ҳеч қандай хавотир ёки қўрқиш йўқ.

— Рақиб жамоа ўйинини ўрганиб чиққан бўлсангиз керак. "Насаф"нинг устун жиҳати нимада?
— Ушбу мавсумда "Насаф"га қарши бир неча марта ўйнадик. Уларнинг кучли ва кучсиз жиҳатларини яхши биламиз. Биз бу ўйинда мезбонмиз ва финалга чиқиш учун гол уришдан ташқари ўз дарвозамиз дахлсизлигини сақлаб қола олишимиз зарур. Қизиқарли ўйин бўлади, деб ўйлайман. Бу ўйиннинг қадрига олтинга тенг эканини яхши биламиз.

— Мухлисларнинг қўллаб-қувватлаши зарурми ёки сиз бор эътиборингизни ўйинга қаратиб, трибуналардаги қўллаб-қувватлашга кўп аҳамият бермайсизми?
— Мухлисларни бекорга 12-ўйинчига қиёслашмайди. Албатта, мухлисларнинг қўллаб-қувватлаши биз учун керак. Боиси мухлислар чин дилдан мухлислик қилса, бу бизга қўшимча куч беради, ўз уйимизда ўйнаётганимизни ҳис қиламиз ва рақибдан кучлироқ бўлишимиз кераклигини англаб етамиз. Футбол — мухлислар тинчгина ўтириб томоша қиладиган ва писта чақиб ўтрадиган спектакл эмас. Жамоа номидан мухлисларимизга қўллаб-қувватлаб турганликлари ва жон куйдираётганликлари учун миннатдорчилик билдираман.

— "Андижон" билан ўйиндан кейин меҳмонлар бош мураббийи Азамат Абдураимов саволларга жавоб берар экан, "Бухоро"нинг финалга чиқишига ишонмаслигин таъкидлади. Бу борада сизнинг фикрингиз қандай?
— Ҳар бир инсонда ўзининг қарашлари мавжуд. Кимнинг нима дегани биз учун муҳим эмас. Ўйиннинг тақдири қандай бўлиши ёлғиз худога аён. "Насаф"ни мағлуб этиш қўлимиздан келади ва биз финалга чиқа оламиз, деб ҳисоблаймиз. Бу йўлда ҳеч нарсадан қайтмаймиз.