Мадриднинг “Атлетико” клуби ҳужумчиси Альваро Мората ҳали ҳам Туриннинг “Ювентус” клубига қайтиш имкониятига эга. Tuttojuve'нинг сўзларига кўра, "кекса синьора" агар трансфер ойнаси тугагунига қадар ҳужумчилардан бири билан хайрлашса, испаниялик футболчини сотиб олишга ҳаракат қилади.
Эслатиб ўтамиз, аввалроқ "Ювентус"ни Душан Влахович тарк этиши кутилганди, туринликлар уни 80 миллион еврога баҳоланган. Шунингдек, А Сериянинг бошқа клублари томонидан қизиқиш билдирилаётган Мойзе Киннинг кетиши ҳам эҳтимолдан холи эмас.
Мората фаолияти давомида икки марта "Ювентус"га ўтди ва жамоада жами 4 йил ўтказди. Альваронинг "Атлетико Мадрид" билан шартномаси жорий мавсум охирида якунига етади.
