Суперлига 18-турида ўз уйида ОКМК билан дуранг ўйнаган “Навбаҳор” клуби бош мураббийи Самвел Бабаян дуранг, аввалги ўйинлардаги омадсизлик, яратилаётган вазиятлар ва учта фронтдаги кураш ҳақидаги саволларга жавоб берди.

“Бугун ҳам ўйинда катта устунликка эга бўлган ҳолда ғалаба қозона олмадик. Ҳар ўйинда рақибларга қараганда устунроқ ҳаракат қилаяпмиз, етарлича ва керагидан ортиқ ҳатто вазиятлар яратаяпмиз, аммо уларни голга айлантира олмаяпмиз. Билмайман, бу нима билан боғлиқ. Тўп шунчаки дарвозага кирмаяпти. Ҳозир ҳатто футболчиларни ҳам танқид қила олмайман, бунга сабаб йўқ. Вазиятлардан фойдаланишда оқсаяпмиз ҳолос”, - деди Бабаян.

“Жиззахда ҳам шундай бўлганди. Вазиятлар етарли, аммо, шунчаки фойдалана олмаяпмиз. Чарчоқ ёки руҳий камчилик? Билмайман. Мен буни чарчоқ билан боғламаган бўлардим. ОЧЛдаги экстра-таймларгача давом этган ўйиндан сўнг Жиззахда ҳам рақибга нисбатан кўпроқ вазият яратдик. Қайтараман, шунчаки вазиятларни голга айлантира олмаяпмиз”.

“Биз ўзимиз қатнашаётган мусобақаларнинг барчасида ҳали курашаяпмиз. Ҳамон курашдамиз. Бугун кўраяпсизки, барча курашмоқда. Осон ғалаба қозона олмайсиз. Жамоалар ҳар бир очко учун курашмоқда. Бугунги жамоалар орасидаги турли интригаларни унутиб фақат футбол ҳақида ўйлаш керак. Биз ҳам ҳали курашамиз”.

“Остон бугун қанча голли вазиятлар яратди. Бир эмас, бешта гол уриши мумкин эди. Психологик томонлама муаммо бордир. Билмайман. Чемпионатимиз анча қизиқарли ўтаяпти. Бугун барча жамоаларда имконият бор. Барчаси олдинда”.