"Барселона" ҳужумчиси Ансу Фати фаолиятини Англияда давом эттиради.
"Брайтон" испанияликни жорий мавсум охиригача сотиб олиш имкониятисиз ижарага олади. Инсайдер Фабрицио Романонинг хабар беришича, клублар келишувга эришган ва 20 ёшли футболчи пайшанба куни Англияга учиб кетади. Sport журналисти Тони Хуанмартининг сўзларига кўра, "чайкалар" ҳужумчининг "Барселона"даги ҳозирги маошининг тахминан 70-75 фоизини қоплайди.
Ансу Фати "кўк-анорранглилар"нинг асосий таркибида 112 ўйин ўтказиб, 29 гол ва 10 голга ассистентлик қилган. Футболчининг Каталония гранди билан тузган меҳнат шартномаси 2027 йилнинг ўрталарига қадар амал қилади.
