Тошкентнинг «Ҳумо» хоккей клуби янги мавсумни соврин билан бошлайдиган бўлди. Жамоамиз Қозоистон кубогида ғолибликни қўлга киритди.

Мусобақада 11та жамоа иштирок этди. Дастлаб жамоалари икки гуруҳга бўлинган ҳолда турнирни бошлашди. «Ҳумо» "В" гуруҳида ўтказилган 4та ўйиннинг барчасида ғалаба қозонди.

Жамоамизга ярим финалда "Торпедо" жамоаси рақиблик қилди. Ўйиннинг асосий вақтида дуранг қайд этилган бўлса (1:1), буллитлар сериясида «Ҳумо» 3:2 ҳисобида ғалаба қозонди.

"Арлан" клубига қарши финал учрашуви эса анча қизғин кечди. Тошкентликлар ўйинни кетма-кет 3 та четлатиш билан бошлашди. Аммо рақиб икки киши кўп бўлиб ўйнаса ҳам дарвозамизга йўл топа олмади. Аксинса, "Арлан" хоккейчисининг четлатилишидан бизникилар унумли фойдаланиб, ҳисобни очишди.

Ўйин тугашига бир дақиқа қолганида эса "Арлан" жамоаси сон жиҳатдан устунликдан фойдаланган ҳолда, мувозанатни тиклади.

Жамоалар 20 дақиқадан иборат 2та овертаймни ўтказишди, аммо ҳисоб ўзгармади. Учинчи қўшимча бўлим ўрталарида эса «Ҳумо»дан бир спортчи четлатилди. Рақиб қулай вазиятга чиқаётган пайтда Павел Синявский дастлаб хавфни бартараф этди, сўнгра шайбани эгаллаб олдинга интилди. Унинг кучли зарбасидан сўнг шайба рақиб дарвозасининг юқори бурчагига кириб кетди.

Ғалаба! "Ҳумо" — Қозоғистон кубоги соҳиби!

Қозоғистон кубоги, финал
«Хумо» - «Арлан» 2:1 ОТ (1:0, 0:0, 0:1, 1:0 ОТ3)
1:0 - 13:12 - Назаревич (Гловацкий, Дорофеев)
1:1 - 58:23 - Лихотников (Сиксна)
2:1 - 108:47 - Синявский