Toshkentning «Humo» xokkey klubi yangi mavsumni sovrin bilan boshlaydigan bo‘ldi. Jamoamiz Qozoiston kubogida g‘oliblikni qo‘lga kiritdi.

Musobaqada 11ta jamoa ishtirok etdi. Dastlab jamoalari ikki guruhga bo‘lingan holda turnirni boshlashdi. «Humo» "V" guruhida o‘tkazilgan 4ta o‘yinning barchasida g‘alaba qozondi.

Jamoamizga yarim finalda "Torpedo" jamoasi raqiblik qildi. O‘yinning asosiy vaqtida durang qayd etilgan bo‘lsa (1:1), bullitlar seriyasida «Humo» 3:2 hisobida g‘alaba qozondi.

"Arlan" klubiga qarshi final uchrashuvi esa ancha qizg‘in kechdi. Toshkentliklar o‘yinni ketma-ket 3 ta chetlatish bilan boshlashdi. Ammo raqib ikki kishi ko‘p bo‘lib o‘ynasa ham darvozamizga yo‘l topa olmadi. Aksinsa, "Arlan" xokkeychisining chetlatilishidan biznikilar unumli foydalanib, hisobni ochishdi.

O‘yin tugashiga bir daqiqa qolganida esa "Arlan" jamoasi son jihatdan ustunlikdan foydalangan holda, muvozanatni tikladi.

Jamoalar 20 daqiqadan iborat 2ta overtaymni o‘tkazishdi, ammo hisob o‘zgarmadi. Uchinchi qo‘shimcha bo‘lim o‘rtalarida esa «Humo»dan bir sportchi chetlatildi. Raqib qulay vaziyatga chiqayotgan paytda Pavel Sinyavskiy dastlab xavfni bartaraf etdi, so‘ngra shaybani egallab oldinga intildi. Uning kuchli zarbasidan so‘ng shayba raqib darvozasining yuqori burchagiga kirib ketdi.

G‘alaba! "Humo" — Qozog‘iston kubogi sohibi!

Qozog‘iston kubogi, final
«Xumo» - «Arlan» 2:1 OT (1:0, 0:0, 0:1, 1:0 OT3)
1:0 - 13:12 - Nazarevich (Glovaskiy, Dorofeev)
1:1 - 58:23 - Lixotnikov (Siksna)
2:1 - 108:47 - Sinyavskiy