Аргентина терма жамоаси ҳужумчиси Лионель Месси ЖЧ-2026 саралаш босқичи доирасида Эквадорга қарши бўлиб ўтган ўйинда (1:0) жамоасининг ягона голини жарима зарбасидан урди.

36 ёшли футболчи учун мазкур гол фаолияти давомида бевосита жаримадан киритилган 65-тўп бўлди. Бу кўрсаткич бўйича у «Интер Майами» хўжайини Дэвид Бекхэмга етиб олди.

«Ан-Наср» клуби ва Португалия терма жамоаси ҳужумчиси Криштиану Роналду эса жарима зарбаси орқали 60 та гол урган.

Жаримадан энг кўп гол урган ўйинчилар рўйхатини қуйидагилар бошқаришмоқда: Жуниньо Пернамбукано (77), Пеле (70), Виктор Легроталье ва Роналдиньо (иккиси 66 тадан).