Москванинг ЦСКА клуби собиқ яримҳимоячиси Ролан Гусев армиячиларнинг таркибига жиддий ўзгартиришлар киритиш шарт эмас деб ҳисоблайди ва Хонданинг кетиши йўқотиш бўлмаслигини таъкидлади.

"Жамоа таркиби яхши. Дарвозабон масаласи узоқ муддатга ҳал қилинган. Ҳимоя ишончли. Яримҳимояда рақобат кучли. Думбия билан Нецид қайтсалар ва Мусанинг ҳозирги ҳолатини ҳисобга олсак, ҳужумдан ҳам кўнгил тўқ бўлади. Уйда ўртаҳол жамоалар билан икки ҳужумчи билан ўйнаса ҳам бўлади.

Хонданинг кетиши, менимча, у қадар катта йўқотиш бўлмайди. ЦСКАда алмаштириб бўлмас футболчилар бор: Дзагоев, Игнашевич, Акинфеев, Березуцкийлар. Хонда эса - супер ўйинчи эмас. Уни у қадар кўкларга кўтариш шарт эмас. Баъзан яхши ўйнайди, баъзан 90 дақиқа шунчаки югуриб юради".