"Манчестер Юнайтед" янги титул ҳомийси билан музокаралар олиб бормоқда.
The Athletic хабарига кўра, манкунианликлар яримўътказгич ва телекоммуникация ускуналари, хусусан, Snapdragon мобил процессорлари ишлаб чиқарувчи Qualcomm компанияси билан потенциал келишувни муҳокама қилмоқда.
"Манчестер Юнайтед" бу келишувдан йилига 60 миллион фунт олмоқчи. Агар келишувга эришилса, катта эҳтимол билан кейинги мавсумдан кучга киради.
Ҳозирда “Манчестер Юнайтед”нинг титул ҳомийси TeamViewer, масофавий фойдаланиш учун дастурий таъминот ишлаб чиқарувчи немис компанияси ҳисобланади. Ушбу шартномага кўра, инглиз клуби йилига 47 миллион фунт олади.
Ўтган йили TeamViewer беш йиллик шартномасини 2021 йилда узайтирмаслигини эълон қилди ва "Манчестер Юнайтед"га ҳомийлик ҳуқуқини сотиб олиш имкониятини берди.
