Номлари сир қолишини айтган ишончли манбаларга кўра, "Бунёдкор" ФК биринчи вице-президенти ва бош директори Баҳромжон Давлатов бугун ўз аризасига кўра эгаллаб турган лавозимидан озод этилган.
Илгари "Машъал", "Насаф" футбол клубларини бошқарган Баҳромжон Бойжонович Давлатов сўнгги бир йил ичида Тошкентнинг "Бунёдкор" клубида биринчи вице-президент ва бош директор лавозимида ишлаётган эди.
Сўнгги пайтларда Б.давлатов ва "Бунёдкор" ФК футболчилари ва мураббийлари ўртасидаги тушунмовчилик борасида бир қанча хабарлар тарқалган эди. Чунончи, Ўзбекистон кубоги-2012 нинг финали — "Бунёдкор"-"Насаф" учрашуви (3:0) да ўзининг одоби билан танилган "Бунёдкор" фан клуби томонидан "Баҳром - йўқол!" чақириқлари янграган.
Мазкур хабар юзасидан "Бунёдкор" футбол клуби матбуот хизмати билан боғланганимизда, Б.Давлатовнинг ишдан бўшаганлиги ҳақида тарқалган хабарлар ҳозирча миш-миш эканлигини таъкидлаб ўтишди.
