Ереван шаҳрида бокс бўйича ёшлар ўртасида ўтказилаётган жаҳон чемпионатида дунёнинг 60дан зиёд давлатидан келган 400 нафардан ортиқ спортчилар ўнта вазн тоифасида ғолиблик учун баҳс юритишмоқда.
Эътиборлиси, мазкур жаҳон чемпионатига тўлиқ таркибда йўл олган Ўзбекистон ёшлар терма жамоаси аъзоларидан тўрт нафари чорак финалга йўлланма олдилар.
Оғирлик вазни 49 кг.гача бўлган боксчилар мусобақасида Ватанимиз шарафини ҳимоя қилаётган Муроджон Аҳмадалиев нимчорак финалда венесуелалик Робертсон Перезни 26:15 ҳисобида мағлубиятга учратиб, медаллар учун курашни давом эттирмоқда.
Вазни 69 кг.гача бўлган чарм қўлқоп усталари ўртасида кечаётган мусобақада яна бир ҳамюртимиз Акмалбек Қосимов ҳам зафарли одимлашда давом этяпти. Акмалбек чорак финалга бериладиган йўлланма учун грузиялик Константин Хвистанига қарши рингга чиқиб, 12:6 ҳисобида ғалаба қозонди.
Жаҳон чемпионатида илк бор иштирок этаётган Азизжон Маматов (-75 кг.) ва Ойбек Шариповлар (-91 кг) ҳам ўзларига билдирилган ишончни оқлаб келишмоқда. Азизжон нимчорак финалда хитойлик Жанг Явейни енгган бўлса, Ойбек беларуслик Матвей Власенкони муддатдан аввал мағлубиятга учратди.
Мусобақалар давом этмоқда.
Шавкат Жалилов
Маданият ва спорт ишлари вазирлиги матбуот хизмати
