Суперлиганинг энг муросасиз дербилардан бири саналувчи “Металлург” – ОКМК қарама қаршилигида кичик устунлик бекободликлар томонида: 31 учрашув, 15 ғалаба, 3 та дуранг, 13 мағлубият. Тўплар фарқи – 51:50, “Металлург” фойдасига.

Мазкур жамоаларнинг Олмалиқда кечган ўйинлари тарихига тўхталадиган бўлсак, унда кончилар устунлигини кўришимиз мумкин. ОТМК ўз майдонидаги 15 баҳснинг 11 тасида ғалаба қозонган. 2 та ўйинда меҳмонларнинг қўли баланд келган ва яна 2 та учрашувда дуранг қайд этилган.

Ўзаро учрашувларда энг кўп тўп киритган ўйинчилар Зоҳид Абдуллаев (“Металлург”, 7 та гол) ва Мўйдин Мамазулимов (ОКМК, 5 та гол)

Қуйида Олмалиқда ўтган сўнгги бешта учрашув натижаси билан танишинг:

03.08.2022  АГМК – Металлург – 0:1
19.06.2021  АГМК – Металлург – 2:0
29.02.2020  АГМК – Металлург – 1:1
28.06.2019  АГМК – Металлург – 1:1
17.08.2018  АГМК – Металлург – 2:3

ОКМК ҳақида

Тошкент вилоятининг ОКМК жамоасига 2004 йилда асос солинган. ОТМК 2008 йилда ЎФФ қарорига биноан олий лига аъзосига айланди. Кейинчалик жамоа мусобақаларда “Олмалиқ”, АГМК номлари остида иштирок этди. Ўтган йилдан эътиборан эса ОКМК номини олди. Жамоа кучлилар сафида 435 та ўйин ўтказган. Шулардан 167 тасида ғалаба қозонган. 103 ўйинда рақиблар билан очкони бўлиб олган. 165 та учрашувда имкониятни бой берган. ОКМК мазкур учрашувларда рақиблари дарвозасига 611 та тўп киритгани ҳолда ўз дарвозасидан 600 та гол ўтказиб юборган. ОКМКнинг кучлилар сафидаги энг йирик ғалабаси – 7:1 (“Қўқон 1912”, 2019), Энг йирик ҳисобдаги мағлубияти эса – 0:6 (“Пахтакор”, 2020).

ОКМК мамлакат чемпионатларида 2 марта бронза медалига сазовор бўлган (2020, 2021 йиллар). 2018 йилда эса Ўзбекистон кубогини қўлга киритган. ОФК кубокларида (2019, 2021, 2023) уч марта иштирок этиб келяпти. Бу йил ОЧЛда саралаш баҳсларидан муваффақиятли ўтди ва гуруҳ мусобақасида мамлакатимз шарафини ҳимоя қилмоқда.