Суперлига 19-турида ўз уйида “ Навбаҳор ”ни мағлуб этган “Андижон” клуби бош мураббийи Александр Хомяков ғалаба, омад, рақиб ва Суҳроб Бердиевнинг голи ҳақида гапирди.

“Барчани табриклайман. Жуда хурсандман. Бугун мухлисларга байрам қилиб беришни хоҳлагандик. Қийин учрашувда ғалабага эришдик. Футболчиларга ўйинга бўлган муносабатлари ва меҳнатлари учун раҳмат айтаман. Қийин ғалаба. “Навбаҳор”га қарши ўйнаш жуда қийин. Бугун омад ҳам биз томонда эди”, - деди Хомяков.

“Рақиб қайсидир маънода муаммоларга дуч келгани ҳақида билардик. Жамоа кўп ўйин ўтказди. Аммо, барибир рақиб сафида сифатли ва даражаси юқори футболчилар тўп суради. Фақат интенсивлик эвазига устунликка эришишимиз мумкин эди. Бугун бу режа тўлиқ ўхшади демаган бўлардим. Ўйиннинг кўп қисмида майдон марказини бой бердик. Шундай бўлсада, охиригача курашдик. Имкон пойладик ва ғалабага эришдик”.

“Суҳроб Бердиевнинг майдонга туширилиши омадли келди. У саккиз дақиқа ичида қаҳрамонга айланди. Нафақат мен, балки жамоадошлари ҳам унга раҳмат айтишимиз керак. У майдонга тушиб барчасини ўзгартириб юборди”.

“Агар ҳисоб 0:2га этганда вазиятни ўзгартира олишимиз қийин бўларди. Бизнинг ҳужум потенциалимиз, ўйинчиларимизнинг ҳолати бундай рақибга қарши бундай ҳисоб бўлиб турган пайтда вазиятни ўзгартириш учун балки камлик қилган бўларди. Биринчи голни ўтказган пайтимизда хато қилдик. Аммо, вазиятни ўнглай олдик. Мураббийга захира ўриндиғи олдида вазиятни баҳолаш қийинчилик туғдиради. Майдон четида бошқача кўринади. Шу боис, ўйин давомидаги хатоларни ўйин тугагач таҳлил қилганимиз қулайроқ”.