Суперлига 19-туридан ўрин олган ОКМК – “Металлург” учрашувидан сўнг мезбонлар бош мураббийи Миржалол Қосимов ўз фикрларини билдириб ўтди.

“Учрашув аввалида стандарт вазиятдан ўтказиб юборган икки тўпимиз қийинчилик туғдирди. Шунга қарамасдан, биринчи бўлимда ҳисобни қисқартирдик. Тўп дарвозага киришни истамаса, кирмас экан. Футбол шуниси билан ҳам қизиқ. Иккинчи таймда Боакьеда ҳам қулай имконият бўлди. Қарши ҳужумда эса “Металлург” ўз имкониятларини голга айлантирди. Ҳисоб 1:3 кўринишига келгач ҳам, қўл силтамасдан, охиригача курашдик.

Сўнгги икки йилдан буён бекободликларни мағлуб қила олмаяпмиз. Мухлислар биздан ғалаба кутишган эди. Улардан узр сўрайман. Келгуси баҳсда уларни хурсанд қилишга интиламиз.

Кейинги учрашувимиз ОЧЛ доирасида бўлади. Ушбу беллашувда таркибда ротация қиламиз.

Ҳар бир футболчининг жамоада ўз ўрни бор, аммо бир футболчига таяниб қолмаймиз. Албатта, Абдуллаевнинг ҳам ўз ўрни мавжуд эди. Унинг келгуси фаолиятига омад ва тилайман” – деди Қосимов.