Суперлига 20-турида ўз уйида ОКМК билан дуранг ўйнаган «Пахтакор» клуби бош мураббийи Максим Шацких дуранг, Ҳамралиев ва Чераннинг йўқлиги, инқироз ва рақиблар кучи ҳақида фикр билдирди.

«Ўйлашимча, бугун анча қизиқарли ва мухлисларга манзур келадиган ўйин бўлди. Бизнинг муаммоимиз – рақибларга ўзимиз гол уриш учун имкон бераяпмиз. Ўзимиз муаммолар яратиб кейин уни енгишга мажбур бўляпмиз. Бошқача ўйнашни билмаймиз шекилли. Футболчилар бугун максимал тарзда ҳаракат қилишди. Уларнинг ҳаракатларига эътироз йўқ. Ўйиннинг дастлабки дақиқаларидан бошлаб шижоат билан ўйнашди. Енгил ғалаба бизга ёқмаяпти, албатта қийналишимиз керакка ўхшайди», - деди Шацких.

«Ҳамралиев албатта биз учун билинадиган йўқотиш. Унинг ёшлар термасига чақирилиши кутилмаган муаммоларни келтириб чиқарди. Унинг кетишини кечроқ эшитдим. Қолаверса, у ҳозир ажойиб формага кириб олганди. Мавсум қизиган паллада кетиши, бизга етарли муаммо келтириб чиқарди».

“Инқироз? Бу фикрга умуман қўшилмаймн. Қаерда инқироз? Ҳа, сўнгги икки ўйинда тўрт очко йўқотдик. Аммо, кимларга қарши ўйинларда очко йўқотдик? «Сўғдиёна» кучсиз рақибми? ОКМК кучсизми? Хатолар бор, айниқса ҳимояда. Аммо, ҳозир осон ўйиннинг ўзи йўқ”.

«Черан бугун жароҳати туфайли майдонга туша олмади. Саудияга, ОЧЛ ўйинига ҳам бора олмаса керак. Шифокорларимиз тез фурсатларда уни тузатиб сафга қайтаришларига умид қиламан».

«Санжар Қувватовга эътирозлар бўлиши ғалати. У жамоамизни бугун ҳам, аввалги ўйинларда ҳам анча қутқарди. Муқаррар голлардан қутқариб қолаяпти. Тўғри, қаердадир хато қилаётган бўлиши мумкин. Аммо, керакли вазиятларда ёрдам бераяпти. Рақобат бўлгани албатта яхши. Хорижлик дарвозабонни шунинг учун олиб келганмиз. Ҳали унда ҳам имконият бўлади».