"Барселона" бош мураббийи Хави Эрнандес ярим ҳимоячи Фермин Лопесни мақтади.
20 ёшли футболчи яқинда "Барселона"нинг асосий жамоасида "Мальорка"га қарши ўйинда дебют голини урди. Жума куни ярим ҳимоячи "Севилья"га қарши ўйиннинг 37-дақиқасида жароҳат олган Рафинья ўрнини эгаллаб, захирадан майдонга тушди.
“Фермин ўйинга жуда мос тушди. Унда бу даража учун сифатлар етарли. Агар бунга ишонса, у "Барселона"да узоқ йиллар қолиши мумкин. Биз академиямиз битирувчиларига имконият беришимиз керак.
Фермин тўпни аъло даражада бошқаради, ўтишга йўл қўймайди ва узоқ масофадан зарба бера олади. Унда "Барселона" ярим ҳимоячиси учун керак бўлган ҳамма нарса бор", - дея Хавидан иқтибос келтиради Sport.
