"Интер" бош мураббийи Симоне Индзаги жамоа ҳужумчиси Лаутаро Мартинеснинг "Салернитана" билан ўйиндаги покери ҳақида гапирди.

Италия чемпионати 7-туридан ўрин олган учрашув 4:0 ҳисобида миланликлар фойдасига ҳал бўлди. Мартинес иккинчи бўлимда захирадан майдонга тушди ва 27 дақиқа ичида тўртта гол урди.

“Лаутаро ҳеч қачон ортга чекинмайди, у доим майдонда борини беради. У тўртта гол урди, аммо бунда жамоа унга ёрдам бергани муҳим. У сардор, ўзини бу ерда етакчидек ҳис қилмоқда", - дея мураббийнинг сўзларини келтиради таниқли журналист Альфредо Педулла.

Жорий мавсумда 26 ёшли Мартинес барча турнирларда саккизта ўйин ўтказиб, ўнта гол урди ва иккита голли узатмани амалга оширди.