Айни дамда «Ботафого» сафида Бразилия чемпионатида тўп тепаётган испаниялик тажрибали ҳужумчи Диего Коста Испания чемпионатига қайтиши мумкин.
Бу ҳақда Todofichajes журналистлари хабар бермоқда.
Манбага кўра, 34 ёшли ҳужумчи хизматларига «Райо Вальекано» қизиқиш билдирмоқда. Клуб Костани январдаги трансфер ойнасида, футболчи эркин агентга айланганда сотиб олмоқчи.
Форварднинг «Ботафого» билан амалдаги шартномаси 2023 йилнинг декабрь ойи охиригача амал қилади.
Бразилия чемпионатининг ушбу мавсумида Диего олтита ўйин ўтказиб, иккита гол урди. Европада испаниялик футболчи «Атлетико Мадрид» ва Лондоннинг «Челси» жамоаларидаги ўйинлари билан танилган.