"Бавария" бош мураббийи Томас Тухель ва клуб спорт директори Кристоф Фройнд ҳар куни алоқада бўлиб, январь ойидаги трансфер ойнаси ва ундан кейин янги трансферларни режалаштирмоқда, деб хабар беради kicker нашри.
Манбага кўра, иккаласи ҳам жуда яхши муносабатларга эга. Тухель ўтмишда ҳар доим ҳам спорт директорлари билан яхши ишламаган. Фройнд ва Тухель жамоанинг кадрларга бўлган эҳтиёжи, шунингдек, Матис Тель ва Франс Кретциг каби ёш ўйинчиларнинг интеграциялашуви борасида келишиб олишади.
Тухель “Бавария”ни 2023 йилнинг мартида бошқариб келмоқда. 50 ёшли мутахассиснинг клуб билан шартномаси 2025 йилнинг ёзига қадар мўлжалланган. Унинг қўл остида клуб ўтган мавсумда Германия чемпионлигини қўлга киритди. Жамоанинг айрим футболчилари Тухелдан норози экани аввалроқ хабар қилинганди.
Фройнд “Бавария”га 2023 йил сентябрь ойида келган.
Етти турдан кейин “Бавария” 17 очко билан учинчи ўринда бормоқда. «Байер» чемпионатда пешқадамлик қилмоқда (19 очко).
