Жиззахнинг "Сўғдиёна" клуби регламентга кўра янги йилда Ўзбекистон олий лигасида тўп тепади. Аммо ПФЛ ҳали якуний қарорни чиқармаган. Клуб бош мураббийи Даврон Файзиев "Футбол Экспресс" газетасига интервью берди. Қуйида ушбу суҳбатнинг асосий жойларини келтирамиз.

Даврон Файзиев: "Сўғдиёна" дастлабки йиғинни бошлаб юборган. Бироқ айни пайтда Тошкентда "А" лицензиясига ўқияпман ва жамоа билан бирга эмасман. Ушбу ўқиш 14 январь куни якунига етади. Жами 18 нафар мураббий курсда таҳсил олмоқда. Мендан ташқари Бахтиёр Ашурматов, Илҳом Мўминжонов, Хорен Оганесян, Шавкат Абдухўжаев каби мураббийлар ҳам "А" лицензия олиш учун ўқишмоқда. Менинг ўрнимга жамоани акам Диёр Файзиев, мураббий Улуғбек Алматов билан бирга бошқариб турибди. Кейинги режаларимиз ҳақида гапирсам, 26 декабрга қадар йиғинимиз давом этади. Байрамни ўтказиб олгач, 5 январь санасида Жиззахда йиғиламиз. 7-18 январь кунлари Зоминда тайёргарлик кўрамиз. 20-30 январь кунлари яна Жиззахда машғулот ўтказамиз. 1 февралдан чемпионат бошлангунича Тошкентда йиғин ўтказмоқчимиз. Агар ПФЛ легионер дарвозабонларга чекловни бекор қилса, жамоага молдавиялик посбон Александр Меленчукни таклиф қиламиз. Айни пайтда биз олий лигада тўп тепишга тайёрмиз. Базамиз бор, уй ўйинларимизни ҳозирча Зоминдаги стадионда ўтказамиз. Менимча, ПФЛ "Андижон" ва "Машъал"ни олиб қолиш учун "Гулистон" ва "Сўғдиёна"ни яна биринчи лигага тушуриб юбормаса керак.

Б.Турсунов суҳбатлашди.

манба: "Футбол Экспресс" газетаси