Болгариялик собиқ футболчи Димитар Бербатов португалиялик форвард Криштиану Роналдуни яна 2-3 йил футбол ўйнай олади, деб ҳисоблайди.

«Роналду ўзи истаган пайтда футболни тўхтатиши мумкин. Агар сиз у каби ўзингизга ғамхўрлик қиладиган бўлсангиз, футболни кутилганидан узоқроқ ўйнай олишингиз мумкин. Назаримда, Криштиану яна 2-3 йил давомида бемалол футбол ўйнай олади.

Одамлар унинг темпи юқори бўлмаган лигада ўйнаётганини гапиришяпти, аммо бу аҳамиятга эга эмас. У ҳамон кучли эканини исботламоқда. У Португалия терма жамоаси сафида ўз ўйинлари ва голлари орқали кучли эканини кўрсатмоқда.

Криштиану Португалия терма жамоасининг Евро-2024 финал босқичига чиқиши учун ёрдам берди. Футболчи учун қачондир сўнгги мусобақа келади, аммо, келинг, ҳозирча бу ҳақда ўйламай турамиз.

Келинг, уни ўз ҳолига қўямиз. У янги қарори билан тез орада барчани ҳайрон қолдиради. Бунга ишончим комил. Ҳозирча эса унинг ўйинларидан завқланиб турамиз», – деди «Манчестер Юнайтед» клубининг собиқ ўйинчиси.